Rutahizamu ukomoka mu gihugu cya Nigeria wari ufatiye runini ikipe ya Bugesera FC, Ani Elijah yamaze kwerekeza muri Police FC nyuma y’imnsi bari mu biganiro byo kumugura ngo abakinire mu mwaka utaha w’imikino.
Ani Elijah bivugwa ko yifuzwa n’ikipe y’Igihugu, Amavubi ni umukinnyi watekerejweho n’ikipe ya Police FC kugira ngo ayikinire mu busatirizi ndetse arumbure n’ibitego dore ko iyi kipe izahagararira u Rwanda mu mikino ya CAF Confederation Cup ya 2024-25 guhera muri Kanama.
Kumvikana kwa Ani Elijah na Police FC byasaga n’ibyahagaze kubera ibyo uyu mukinnyi yasabaga iyi kipe ntibabyumvikaneho ariko ku mugoroba wo kuri uyu wa Kabiri taliki 4 Kamena 2024, uyu mukinnyi wari usigaje umwaka umwe gusa muri Bugesera FC, nibwo yasinyiye Police FC amasezerano y’imyaka ibiri ndetse amakuru akavuga ko yatanzweho miliyoni 50 Frws.
Ani Elija akaba yarigaragaje neza mu mwaka w’imikino ushize aho yabashije gutsinda ibitego 15 muri shampiyona akaba abinganya na Victor Mbaoma wa APR FC. Ndetse byatumye yifuzwa n’amakipe akomeye hano mu Rwanda arimo APR FC na Rayon Sports ariko ntibyayakundira ko amugura.
Ani Elijah amaze umwaka umwe gusa mu Rwanda, akaba ari mu bakinnyi barimo guhatanira igihembo cy’umukinnyi witwaye neza mu mwaka w’imikino wa 2023/24 aho mu guhatanira ibi bihembo ari kumwe na Muhire Kevin wakiniraga Rayon Sports na Ruboneka Jean Bosco wakiniraga ikipe y’Ingabo z’Igihugu.
