Umuhanzikazi Bwiza Emerance wamamaye nka Bwiza mu ndirimbo zinyuranye, yahawe ikaze mu muryango wa Sosiyete y’Itumanaho ya MTN ifatwa nka nimero ya mbere mu Rwanda, agirwa ‘Brand Ambassador’, aho azifashisha imbuga nkoranyambaga ze n’ahandi afite ijambo mu kumenyekanisha ibikorwa by’iyi sosiyete.
Ku mugoroba wo kuri uyu wa Gatatu tariki 31 Nyakanga 2024, nibwo MTN ibinyujije ku mbuga nkoranyambaga zayo zatangaje ko yatangiye imikoranire n’umuhanzikazi Bwiza. Bati “Bwiza buri gihe uhawe ikaze/urisanga mu muryango. Turiteguye.”
Ni ubwa mbere uyu mukobwa umaze imyaka ibiri mu muziki akoranye na MTN. Ariko yagiye agaragara mu bikorwa bitandukanye byabaga byateguwe n’iyi sosiyete.
Mu mashusho yashyizwe hanze, agaragaza ko Bwiza yakiriwe n’umukinnyi wa filime, Niyitegeka Gratien wamamaye nka Papa Sava umaze imyaka itanu akorana n’iyi sosiyete. Muri aya mashusho Bwiza agira ati “Nditeguye! Nanjye ubu ndi mu muryango wa MTN.”
