Mu gihe habura ukwezi kumwe ngo Shampiyona y’u Rwanda itangire, Musanze FC yongereye Ntijyinama Patrick, Ntaribi Steven, Salomon Adeyinka na Muhire Anicet.
Kuri uyu wa Gatanu, tariki ya 19 Nyakanga 2024, nibwo ubuyobozi bwa Musanze FC bwatangaje ko abakinnyi bayo bane bagomba kugumana nayo mu mwaka utaha w’imikino.
Ntijyinama Patrick ‘Mbogamizi’ ari nawe kapiteni w’iyi kipe yahawe amasezerano y’imyaka ibiri ndetse umunyezamu Ntaribi Steven na Salomon Adeyinka nabo bakaba ariyo bahawe.
Myugariro Muhire Anicet uri mu bakinnyi bafashije cyane Musanze FC mu mwaka ushize yahawe imyaka itatu ari umukinnyi wayo kugeza mu 2027.
Iyi kipe yo mu Ntara y’Amajyaruguru yongereye amasezerano aba bakinnyi nyuma yo gutandukana n’abarimo Muhawenayo Gad, Manzi Aimable, Aime Djicka Gassissou na Ebode Bertrand.
