Umusore witwa Iradukunda Japhet wiyita Ishimwe Kenny w’imyaka 20 yavuganye agahinda kenshi agaragaza uko yatekewe imitwe n’uwiyita Mpanoyimana abenshi bita Theobald umaze iminsi arikoroza ku mbuga nkoranyambaga cyane cyane urwa YouTube aho agaragara avuga ko aha abantu ubukire abaha amafaranga menshi.
Uyu musore utuye i Kanombe mu mujyi wa Kigali avuga ko nyuma yo kumara iminsi nta kazi afite mu mujyi wa Kigali yabonye ko azagorwa no kwishyura inzu ndetse no kubona ibimutunga, ari cyo cyatumye yigira inama yo gushaka Mpanoyimana asanzwe abona ku mbuga za YouTube amusaba ko yamuha amafaranga Miliyoni y’amanyarwanda.
Mu majwi uyu musore yahaye umunyamakuru Bayisenge Paterne wa YouTube channel yitwa Umusambi TV Mpanoyimana yumvikana asaba uyu musore ko yohereza amafaranga 15,500Frws yo kugura ikaziye ya Mitzing kugira ngo amufashe. Mpanoyimana yamuhaye nimero 0796131136 ngo anyuzeho ayo mafaranga ariko nyuma byaje kurangira amubwiye ko ntayo yabonye.
Uyu musore akomeza avuga ko byamubabaje cyane ngo kuko ariyo mafaranga yari asigaranye imbere n’inyuma ndetse agasaba n’umugiraneza waba afite akazi ko yamufasha cyangwa se bakamufasha mu bundi buryo ngo kuko ntako abayeho.
