Kuri uyu wa Kane, Igipolisi cya Kenya cyagerageje guhagarika imyigaragambyo rwagati mu murwa mukuru wa Nairobi gusa urukiko rwitambitse iki cyemezo.
Polisi yashyizeho iryo tegeko ivuga ko imyigaragambyo yahitanye nibura abantu 50 kuva yatangira hashize ukwezi, yacengewemo n’udutsiko tw’abagizi ba nabi.
Ariko kuri uyu wa Kane urukiko rwahagaritse iryo tegeko mu gihe ikirego kirirwanya kirimo kuburanishwa nk’uko iyi nkuru dukesha Reuters ivuga.
Impirimbanyi zimwe zari zahamagariye abantu guterana kuri uyu wa Kane bafite ibikoresho byo gukambika muri Parike ya Uhuru yegeranye n’umujyi rwagati, mu gihe abapolisi benshi bari muri Nairobi.
Imyigaragambyo iyobowe n’urubyiruko hirya no hino muri Kenya yamagana izamuka ry’imisoro yarakomeje na nyuma y’uko Perezida William Ruto akuyeho amategeko akirukana guverinoma hafi ya yose.
Abayoboye imyigaragambyo bavuga ko bifuza ko Perezida Ruto yakwegura kandi bagasaba ko habaho amavugurura arandura ruswa n’imiyoborere mibi.
