Rayon Sports FC yamaze kwakira myugariro Omar Gningue wari Kapiteni w’Ikipe ya As Pikine yo muri Sénégal, aho yageze mu Rwanda ndetse akaba agomba guhita ashyira umukono ku masezerano. Mu ijoro ryo kuri Cyumweru, tariki ya 7 Nyakanga 2024, nibwo Umuvugizi wa Rayon Sports, Ngabo Roben, yageze ku Kibuga Mpuzamahanga cy’Indege cya Kigali aho yari yagiye kwakira uyu mukinnyi.
Nyuma yo kumwakira nk’uko byatangajwe n’ubuyobozi bw’Ikipe bubinyujije ku mbuga nkoranyambaga, uyu myugariro w’Umunya-Sénégal arakorana imyitozo no bagenzi be kuri uyu wa Mbere. Kugira ngo Gningue ave muri AS Pikine y’iwabo byabaye ngombwa ko amakipe yombi yumvikana, bityo Rayon Sports yishyura ibihumbi 25$ cyane ko yari akiyifitiye amasezerano.
Uyu mukinnyi wasinye amasezerano y’imyaka ibiri asanze abandi bageze muri Rayon Sports barimo Fitina Omborenga watandukanye na APR FC, Richard Ndayishimiye wavuye muri Sunrise, Niyonzima Olivier Seif wakiniraga Kiyovu Sports, Rukundo Abdul Rahman wavuye mu Amagaju n’abandi.
