Ibi Byabereye mu Mudugudu wa Gasharu, Akagari ka Gasharu, Umurenge wa Gitesi mu Karere ka Karongi ku wa 26 Gicurasi 2024, Aho Umukecuru Bajyagahe Suzanne w’imyaka 81 y’amavuko yahanutse kuri moto yitura yasi arapfa.
Mu masaha y’igicamunsi kuri iki Cyumweru, uyu mukecuru yavuye mu rugo iwe mu kagari ka Burunga, mu Murenge wa Bwishyura agiye ku Gasenyi mu rubanza rw’ishyamba ryatemwe. Hashize iminota mike afashe moto nibwo yahanutse yitura hasi, bamwihutana ku Kigo Nderabuzima cya Kirambo, agerayo yapfuye.
Umunyabanga Nshingwabikorwa w’Umurenge wa Gitesi, Nsanganira Vianney yavuze ko iperereza ry’ibanze ryagaragaje ko iyi mpanuka yatewe no kuyobora moto nabi k’uwari utwaye moto.
Polisi y’u Rwanda ikunze gusaba abakoresha umuhanda kubahiriza amategeko no kwirinda uburangare kuko 80% by’impanuka zibera mu muhanda kuzirinda bishoboka igihe abakoresha umuhanda bubahirije amategeko y’umuhanda.
