Abagabo bane bakekwaho kuba abajura bateye mu rugo rw’umuturage utuye mu Murenge wa Nyabirasi mu Karere ka Rutsiro usanzwe ucuruza intama, baramutema banamwiba miliyoni ebyiri z’amafaranga y’u Rwanda. Ibi byabaye mu ijoro ryo kuri uyu wa Kabiri taliki 23 Mata 2024.
Umunyamabanga Nshingwabikorwa w’Umurenge wa Nyabirasi, Mpirwa Migabo, yabwiye IGIHE dukesha iyi nkuru ko abateye urugo rw’uyu mucuruzi bagera kuri bane ndetse umwe yamumenye ku buryo yamaze gutabwa muri yombi
Yagize ati “Nibyo bateye mu rugo rw’umucuruzi ucuruza amatungo magufi uyakura inaha akayohereza Mahoko ubwo bakindaguranye bamutema ku maboko ariko yabashije kumenyamo umwe uba mu Murenge wa Nyundo.”
Yakomeje avuga ko mu gitondo ubuyobozi na Polisi ndetse na DASSO babyukiye mu mukwabo ndetse uyu mugabo bivugwa ko yari kumwe n’abandi bateye uyu mucuruzi akamumenya bamutaye muri yombi banamufatana amafaranga mu rugo rwe.
Yongeyeho ko uyu mucuruzi yajyanywe ku Kigo Nderabuzima aravurwa ku buryo yahise ataha ndetse uyu mugabo bikekwa ko yari kumwe n’itsinda ryamuteye ubu afungiye kuri Sitasiyo ya RIB ya Kivumu.
