Abakinnyi ba Rayon Sports barimo Youssef Rharb, Khadime Ndiaye na Charles Bbaale barwanye n’aba Bugesera FC barimo Isingizwe Rodrigue na Hoziyana Kennedy nyuma y’umukino wa 1/2 wo kwishyura mu Gikombe cy’Amahoro, wabaye ku wa Kabiri tariki ya 23 Mata 2024.
Bugesera FC yageze ku mukino wa nyuma itsinze Rayon Sports igitego 1-0, biba ibitego 2-0 mu mikino ibiri.
Ubwo Umusifuzi Mukansanga Salima Rhadia yari asoje umukino, abakinnyi ba Bugesera FC bagiye kwishimira intsinzi imbere y’abafana ba Rayon Sports, bakora ikimenyetso cyo kubacecekesha.
Ntibyagarukiye aho kandi, kuko Myugariro Isingizwe Rodrigue yagiye kubikorera n’imbere y’intebe y’abatoza n’abakinnyi ba Rayon Sports bari babuze intege zibahagurutsa, mu rwego rwo kubishyura kuko Julien Mette yabikoze ku mukino Gikundiro yatsinzemo Bugesera FC ku wa Gatandatu muri Shampiyona.
Ibi byashenguye abarimo Youssef Rharb na Khadime Ndiaye bashatse gukubita uyu mukinnyi na bagenzi be bari inyuma, ndetse uyu Munya-Maroc na Isingizwe baterana ibipfunsi mu gihe na Hoziyana Kennedy yagaragaye ashaka kurwana na Youssef.
Umusifuzi Mukansanga warebaga ibiri kuba ari kumwe na bagenzi be, yahamagaye Youssef amuha ikarita itukura, uyu Munya-Maroc ahita agenda akubita ibipfunsi aho abasimbura bicara n’uburakari bwinshi.
Ntibyagarukiye aho, Mukansanga yahamagaye kandi Isingizwe Rodrigue na we amuha ikarita itukura, ariko uyu asa n’utayemera, Team Manager wa Bugesera FC, Itangisha Eric ’Dinho’, araza amwigizayo mbere y’uko uyu mukinnyi afatwa na Peter Otema ushinzwe kongerera imbaraga abakinnyi b’iyi Kipe yo mu Burasirazuba.
Mu gihe abasifuzi bayobowe na Mukansanga bibwiraga ko birangiye, basohotse mu kibuga kuko imvura yari itangiye kugwa, abakinnyi bari basigaye inyuma bongeye gusakirana, Khadime Ndiaye na Charles Bbaale bashaka kurwana n’abakinnyi ba Bugesera FC na Team Manager wayo, Itangishaka wasubiye inyuma akagwa hasi mbere yo guhungishwa na Gatete uri mu bari bashinzwe umutekano ku kibuga.
Polisi y’Igihugu yahise yinjira mu kibuga yihuta, ifata abakinnyi bashakaga kurwana barimo Umunyezamu Khadime Ndiaye ndetse na Team Manager wa Rayon Sports, Mujyanama Fidèle, wagaragazaga ko atemeranya n’ibiri kuba.
Nyuma yo gusezerera Rayon Sports, Bugesera FC izahura na Police FC ku mukino wa nyuma uteganyijwe tariki ya 1 Gicurasi 2024.
Ikipe izatwara Igikombe cy’Amahoro ni yo izaserukira u Rwanda muri CAF Confederation Cup y’umwaka w’imikino wa 2024/25.
Inkuru ya IGIHE.COM
