Nibura abantu 24 baburiwe irengero mu mpanuka y’ubwato iheruka kubera mu kiyaga cya Tanganyika ubwo ubwato buzwi ku izina rya Maman Benitha bwavaga mu gihugu cya Tanzania bwerekeza muri Kalemie ho muri Repubulika ya Demukarasi ya Congo.
Amakuru avuga ko ubu bwato bwakoze impanuka biturutse ku muhengeri ukaze wabaye mu kiyaga cya Tanganyika mu ijoro ryo kuwa Gatandatu rishyira ku Cyumweru taliki ya 7 Mata ubwo ubwato bwari bugeze ku nkombe ya Kalemie.
Kugeza ubu ntiharamenyekana neza umuubare nyakuri w’abari bari muri ubwo bbwato ngo kuko bose ntibagaragara ku rutonde rw’abari binjiye mu bwato, ariko amakuru acicikana ku mbuga nkoranyambaga aravuga ko abari mu bwato; abagenzi hamwe n’abakozi bose hamwe bageraga kuri 40.
Ubu bwato bwarimo abantu bava mu bihugu bitandukanye nk’uko bitangazwa na Komiseri w’ikiyaga aho avuga ko harimo Abanyekongo, Abatanzaniya, Abashinwa n’Abanyakenya.
Amakuru akomeza avuga ko ubu bwato bwavaga i Kigoma muri Tanzania bwuzuye iibicuruzwa bwerekeza i Kalemie muri Repubulika ya Demukarasi ya Congo.
Amakuru kandi avuga ko hari Umushinwa wabashije kurokoka, arokowe n’abarobyi bari mu kiyaga akaba yarahise yihutanwa kwa muganga i Kabimba mu majyaruguru ya Kalemie kugira ngo yitabweho.
