Umutoza mukuru w’ikipe ya Bugesera FC, Haringingo Christian Francis yavuze ko ahanze amaso imikino isigaye harimo n’uzamuhuza n’ikipe ya Rayon Sports kugira ngo arebe ko yarokora ikipe ye ngo itamanuka mu cyiciro cya kabiri cya Shampiyona yo mu Rwanda.
Ibi Haringingo Francis yabitangaje kuri uyu wa Gatanu taliki ya 5 Mata 2024, nyuma y’umukino wari wahuje iyi kipe yo mu Bugesera na Marine FC mu karere ka Rubavu ku mukino w’umunsi wa 26 wa Shampiyona aho umukino warangiye aya makipe yombi nta n’imwe ibashije kureba mu izamu.
Ubwo yabazwaga niba afite icyizere cyo kuguma mu cyiciro cya mbere, uyu mutoza yavuze ko icyizere gihari ngo kuko bagifite imikino ine yose kandi ko n’amakipe bari kumwe mu myanya y’inyuma atabarusha amanota menshi aho amenshi agiye abarusha inota rimwe gusa, ibyo bikamuha icyizere ko bazakora iyo bwabaga bakaguma mu cyiciro cya mbere.
Mu mukino uzakurikiraho ikipe ya Bugesera izahura na Rayon Sports aho ifite akazi katoroshye, kuko bazakina imikino ya Shampiyona ndetse n’umukino w’igikombe cy’Amahoro ariko Haringingo akavuga ko agiye kwitegura neza kugira ngo iyi kipe ikunzwe na benshi mu Rwanda azayikureho amanota atatu kugira ngo ikipe ya Bugesera ikomeze kubarirwa mu cyiciro cya mbere.
Ikipe ya Bugesera FC iri ku mwanya wa 14 n’amanota 25 ku mwanya wa Shampiyona yo mu Rwanda, aho irushwa na Sunrise FC inota rimwa, nahob Gasogi United, Gorilla, Etincelles na Marine zikayirusha amanota ane.
Mu mikino ikurikira, Bugesera FC izahura na Rayon Sports, Police FC, Muhazi United na Etoile de l’Est.
